Joh 2 | KMG | STEP | Gie bapa jajahec tarame Kana haeo Galilaia mâreŋko ŋic ŋokac jajahec muturec-jofaniŋte irec tiwâ bâzi qapie fisiwec.

John 2

Jesuzi mume opâzi waiŋ ewec

1 Gie bapa jajahec tarame Kana haeo Galilaia mâreŋko ŋic ŋokac jajahec muturec-jofaniŋte irec tiwâ bâzi qapie fisiwec. 2 Ehuc Jesu neŋgoc-ticne erâ e jahacne â motecfâc-ticne mâmâc hefârec-jopapie fisimbiŋ. 3 Eme tumaŋnerâ bâzihec waiŋ nâpie šickeme Jesu neŋgoc-ticnezi e âzâcnerâ muwec: “Waiŋ-jeŋic omaekac.” 4 Mume Jesuzi šiŋuc âzâcnewec: “Ŋokac, i nâhâcne wiac me? Dameŋ-nane miŋecnea maickeocmu.” 5 Eme neŋgoc-ticnezi kiŋaŋ qaqa šiŋuc jazawec: “Wiac mocte ŋazame enšepieŋ.” 6 Eme fic ira opâ pake 6 ŋewec. Judaŋic jaŋe me sahac-jeŋic gâbâ šure jumbieŋte fic sâc opâ pake iŋuc ŋerawec. Pake i piticne mâcne, kâcɋene sâko. 7 Eme Jesuzi kiŋaŋ qaqa šiŋuc jazawec: “Ŋoŋe opâ fiarâ pakeo qapie huoc.” Eme jaŋe iŋuc erâ opâ qapie hurâ pake micnao qafârewec. 8 Iŋuc epie šiŋuc jazawec: “Ŋoŋe tucne fiarâ nânâ soŋaŋtao baraniŋ.” 9 Eme jaŋe fiarâ barahapie opâzi waiŋ eme nânâ soŋaŋzi nâhonerâ kâuc bawec. Kiŋaŋ motec opâ fiarâ pakeo qapie huwec jaŋe sawazi waiŋte fuŋne mana tarambiŋ. Eme nânâ soŋaŋzi ŋic ŋokac bawec, e hefârerâ 10 šiŋuc âzâcnewec: “Qanaŋ waiŋ aŋacne gumec-jopapene nâkupie maŋjeŋic bibiriwazo eme šâhec waiŋ oomane gumec-jopaeŋgopeneŋ, hata-nâŋec iŋuc fokac. Go ine qac qâtikic ehuc aŋacne hefacketec ŋeku šâhec fuakac.”

11 Jesu e Kana haeo Galilaia mâreŋko ira hâcne mâsi bapa gie-ticne fuŋkehuc Wofuŋ qâreŋ-ticnere foŋ bararuŋkewec. Eme motecfâcne jaŋe honerâ e manasiŋkembiŋ.

Jesu e taha ufuŋ furu muwec

(Mat 21: 12-13” Maò 11: 15-18” Luë 19: 45-46)

12 Eme Jesu e Kana haeonec Kafanaum haeo rame neŋgoc ɋafâc-ticne â motecfâc-ticne mâmâc bâjâperâ rafârembiŋ. Eme ira boc mi jumbiŋ. 13 Judaŋic aakic hombaŋ-jeŋic bembeŋkewecte Jesuzi Jerusalem haeo rafewec. 14 Eme taha ufuŋ šuhucnao lama bulimakao â hapâ wiac badomahuc nareŋ gareŋ embiŋ, ehuc irec moneŋ teboo wose biric embiŋ. 15 Iŋuc epie Jesuzi honec-joparâ repa mizeme šika eme ŋic mecne lama bulimakao mecne jâpec-jopame wisepie moneŋ tie-jarerâ irec tebo herândiŋkewec. 16 Erâ hapâ badomambiŋ jaŋe šiŋuc jazawec: “Ŋoŋe Mamac-nanere ficko wiac kosa mi epie situâc fic ezejec.” 17 Jesu e iŋuc eme motecfâcne jaŋe miti papiao dâŋqâreŋ kecšiŋuc fokac irec manasumbiŋ: “Gore ficte erâ bunane šoc šarâ šâfitacnukac.” 18 Eme Judaŋic jaŋe wiocnerâ mumbiŋ: “Go iŋuc ekomeczi wemo mâsi moc bahuc fuŋnege bataniŋke-nârecmu?” 19 Eme micjeŋicko rorâ šiŋuc jazawec: “Ŋoŋe taha ufuŋ kecši heropiepie noni šoaŋ jahec â moc eha mocwâc bâzickepemu.” 20 Iŋuc muhuc jazame mumbiŋ, “Kâcɋenefâc-nâŋec jaŋe taha ufuŋ ši jara 46 baku bâzickembiŋ, eme goki šoaŋ jahec â moc sawa ira bâzickezo mukomec me?” 21 Jesu eki ine sahac-ticnere ufuŋko ɋetickehuc muwec. 22 Juku hâmockonec ɋârerâ fahareme motecfâcne jaŋe dâŋ i manasumbiŋ. Ehuc ufuŋte muwec, â miti papiao ere dâŋ gâcne mukicne, irec mâmâc manapie fârine eha mana šakiembiŋ.

23 Jesu e aakic hombaŋko Jerusalem haeo juhuc fuŋne qaqa mâsi bame ŋic bocjahazi honerâ šâŋe-ticne mana sakac embiŋ. 24 Jesu e jahac ine ŋic hone tarac-jopa-fârewecte jaŋerao mi fohorewec. 25 E ŋic mocte fuŋne manaocte gâcne mu indiŋ mi ejarewec, e jahaczia ŋic maŋjeŋic hone šâŋitac ejare-fârewec.